Operacion i tensionuar në Iran pas rrëzimit të avionit, raportohen viktima dhe kërkime për pilotin

Një situatë e paqartë dhe e tensionuar është zhvilluar gjatë orëve të fundit në Iran, ku informacionet mbeten të kufizuara dhe shpesh kontradiktore.

Sipas raportimeve paraprake, sulme ajrore janë regjistruar në qytetin Dehdasht, në qarkun Kohgiluyeh, pikërisht në zonën ku një avion u rrëzua dy ditë më parë. Nga këto sulme raportohet se të paktën katër persona kanë humbur jetën dhe një tjetër është plagosur, ndërsa burime të tjera jozyrtare sugjerojnë se numri i viktimave mund të jetë edhe më i lartë.

Ndërkohë, janë përhapur lajme të pakonfirmuara për përplasje në terren, por deri tani nuk ka konfirmim zyrtar për këto zhvillime.

Situata në zonë përshkruhet si shumë e tensionuar, ndërsa gjithnjë e më shumë po qartësohet se bëhet fjalë për një operacion të mundshëm nga ana e Shteteve të Bashkuara për të shpëtuar pilotin e dytë të avionit të rrëzuar.

Autoritetet iraniane kanë qenë gjithashtu në kërkim të pilotit, duke u bërë thirrje edhe civilëve gjatë ditëve të fundit që të ndihmojnë në gjetjen e tij. Madje, është ofruar edhe shpërblim për këdo që do të jepte informacion të vlefshëm për vendndodhjen e tij.

Deri në këto momente, mbetet e paqartë se çfarë ka ndodhur saktësisht në terren dhe cili është fati i pilotit, ndërsa pritet që zhvillimet e mëtejshme të hedhin më shumë dritë mbi këtë ngjarje të ndërlikuar.