Bllokimi i lejeve të ndërtimit, bashkitë kërkojnë shfuqizimin e vendimit në Kushtetuese

Pas vendimit të qeverisë për bllokimin e lejeve të ndërtimit, bashkitë kërkojnë shfuqizimin e vendimit në Gjykatën Kushtetuese.

Paraditen e sotme, Gjykata Kushtetuese pasi dëgjoi palët bëri shqyrtimin e rastit.

Kushtetuesja rrëzoi kërkesën e Bashkive për pezullimin e efekteve të vendimit të KKT-së, për bllokimin e dhënies së lejeve të ndërtimit.

Dhurata Cupi si përfaqësuese e shoqatës së bashkive kërkoi rrëzimin e vendimit të KKT-së.

Sipas saj, me këtë vendim ndërhyhet në të drejtën e pushtetit vendor. “Edhe për një rast rreziku mbi një objekt është kryetari i njësisë që merr vendimin pezullimi”- tha ajo, duke shtuar se me këtë vendim preket Karta Europiane e Autonomisë Vendore.

Ivi Kaso tha se dhe vetë vendimi i marrë nga qeveria nuk është I drejtë. Sipas tij ligji për ndarjen e re administrative kërkon riorganizimin e planeve rregulluese, por vendimi i pezullimit për zhvillimin e territoreve ka dalë para se ligji të hyjë në fuqi.

Lindita Gaba e KKT-së, tha se nuk është përjashtuar pushteti vendor, por është kërkuar bashkëpunim në hartimin e planit të ri.