BQE përfundon me sukses programin e asistences teknike me BSH-në

Banka Qendrore Evropiane (BQE), së bashku me 11 banka qendrore të Sistemit Europian të Bankave Qendrore, përfundoi me sukses një program asistence teknike me Bankën e Shqipërisë.

Synimi i programit ishte mbështetja e Bankës së Shqipërisë në procesin e përafrimit me rregullat, procedurat dhe standardet e bankingut qendror në Bashkimin Evropian. Programi i financuar nga Komisioni Evropian filloi më 17 prill 2014 dhe u implementua nga BQE në partneritet me bankat qendrore të Gjermanisë, Francës, Italisë, Maltës, Holandës, Austrisë, Portugalisë, Sllovenisë, dhe Sllovakisë. Gjithashtu, programi u mbështet edhe me ekspertë nga bankat qendrore të Bullgarisë dhe Republikës Çeke.

Përgjatë gjashtë muajve të zbatimit, ekspertë nga BQE-ja dhe bankat qendrore pjesëmarrëse në program vlerësuan dhe analizuan 13 funksione të Bankës së Shqipërisë në krahasim me standardet dhe politikat e BE-së e ato ndërkombëtare. Siç u theksua nga Zëvendësguvernatorja e Parë e Bankës së Shqipërisë,  Elisabeta Gjoni, programi i bashkëpunimit me BQE ishte një kontribut i rëndësishëm në përshpejtimin e harmonizimit të praktikave të Bankës së Shqipërisë me standardet evropiane dhe forcimin e kapaciteteve administrative të institucionit, në dobi të ekonomisë shqiptare në përgjithësi. Banka e Shqipërisë u angazhua të implementojë rekomandimet e paraqitura në raportin përfundimtar të programit, duke i përfshirë ato në planet e veta strategjike dhe operacionale.

Një formë e tillë bashkëpunimi kontribuoi në forcimin e marrëdhënieve ekzistuese dhe zgjerimin e rrjetit të bashkëpunimit midis Bankës së Shqipërisë, bankave qendrore të rajonit dhe Eurosistemit. Ndër faktorët kryesorë të suksesit të programit ishin shkalla e lartë e përgjegjësisë të treguar nga Banka e Shqipërisë, niveli i lartë i besimit, profesionalizmit dhe dedikimit të ekspertëve vendas dhe të huaj të angazhuar gjatë gjithë kohëzgjatjes së programit.

Përfundimi i këtij programi përbën një hap të rëndësishëm drejt forcimit të pavarësisë, transparencës, llogaridhënies dhe profesionalizmit të Bankës së Shqipërisë, si dhe për nxitjen e stabilitetit monetar dhe financiar në vend