BSH-ja, Rama takon Guvernatoren në detyrë. Gjoni dëshmon nesër në Prokurori

Skandali i vjedhjes së BSH-së dhe arrestimet e fundit, përfshirë dhe atë të ish-Guvernatorit  Fullani, e kanë përfshirë kryeministrin Edi Rama në një seri takimesh të rëndësishme me autoritete financiare vendore dhe të huaja.

Sot kreu i qeverisë ka qenë në zyrat e Bankës së Shqipërisë pranë sheshit “Avni Rustemi”, ku ka takuar Guvernatoren në detyrë, Elisabeta Gjoni. Ishte vetë kjo e fundit që e ka pritur Ramën në dyert e kangjellave të këtij institucioni. Ky është takimi i dytë i Ramës me Gjonin brenda 24 orësh.

Sipas zyrës së shtypit të kryeministrit, Rama nuk do të dalë para medieve, por ndërkohë ka përcaktuar një konferencë për shtyp në orën 12:30 në mjediset e kryeministrisë.

Mësohet se gjatë takimit, kryeministri ka shprehur qëndrimin e qeverisë dhe të mazhorancës në mbështetje të pavarësisë së Bankës së Shqipërisë, duke respektuar profesionalizmin dhe punën plot përkushtim.

Në ditët e fundit, Rama është takuar për çështjen e Bankës së Shqipërisë edhe me Presidentin Bujar Nishani, Kryetarin e Kuvendit Ilir Meta dhe me ekspertë financiarë të FMN-së në vendin tonë.

Ndërkohë, Guvernatorja në detyrë, Elisabeta Gjoni, e cila më parë ka mbajtur postin e zv/Guvernatores së BSH-së si zëvendëse e Fullanit, do të pyetet nesër në Prokurori, ku do të dëshmojë para drejtuesve të akuzës për ato që di mbi vjedhjen e 713 milionë lekëve nga Thesari i Shtetit. Në të vërtetë thirrja në organin e akuzës ishte përcaktuar sot, por takimi me kryeministrin Rama e ka shtyrë praninë e Gjonit.