Bushati: Kriza, artificiale. Shtyrja e zgjedhjeve, jo në dorën tonë

Në një intervistë për “Euractiv”, kreu i diplomacisë shqiptare Ditmir Bushati e cilësoi artificiale krizën politike në Shqipëri.

“Ju i referoheni bojkotit të opozitës, – i tha ministri i Jashtëm bashkëbiseduesit Georgi Gotev, – por kjo nuk është diçka e re në jetën politike anekënd Ballkanit, e ndoshta edhe Mesdheut do të thosha. Korrikun e kaluar i aprovuam me votë unanime ndryshimet kushtetuese, që lejojnë një implementim të patrazuar të Reformës në Drejtësi. Vendosëm një kusht barazie, sipas të cilit, pjesët më të rëndësishme të reformës do të mbështeten mbi këtë barazi politike”, shpjegon Bushati, duke kujtuar sesi aprovimi i Reformës në Drejtësi ishte një kusht themelor i BE-së për bisedimet e anëtarësimit.

“Tani që çdo gjë u kalua në Parlament, – vazhdon ai, – ndeshemi me bojkotin e opozitës. Në këtë situatë, dy mundësi kemi përpara nesh: e para të vazhdojmë zbatimin, ashtu siç ishte rënë dakord bashkë me opozitën në mënyrë që të procedohet jo vetëm me procesin e reformës, por edhe me axhendën e anëtarësimit të Shqipërisë në Bashkimin Europian. Ose t’i shkojmë pas asaj. Mendoj se do të ndjekim mundësinë e parë e do të sigurohemi për zbatimin e Reformës në Drejtësi, e cila ka fituar popullaritet të gjerë mes qytetarëve tanë”, shton ai.

Bushati përcjell më tej bindjen se zgjedhjet e 18 qershorit do të zhvillohen në kushte normale, duke përmendur edhe ndihmën e misionit të OSBE-ODIHR-it.

“Ka disa afate kushtetuese në lidhje me zgjedhjet, – thotë ministri, – dhe ato janë respektuar gjithmonë. Zgjatja e mandatit nuk është në dorën tonë e as të forcave të jashtme. Është paradoksale, – vazhdon ai, – që opozita nuk kërkoi zgjedhje të parakohshme më parë, siç ndodh kudo në botë, por tani që po afrojnë zgjedhjet ajo pretendon shtyrjen e tyre”.

Bushati preku dhe çështjen e Maqedonisë, e tha se nuk ekziston një platformë e Tiranës, por thjesht një dokument i hartuar nga 3 prej 4 partive politike shqiptare të përfaqësuara në Parlamentin e vendit, i cili është mbështetur nga Tirana zyrtare.