Çuçi: Reduktohen në 150 zyrat e Gjendjes Civile, shërbimet do merren online
Ministri i Brendshëm Blendi Çuçi deklaroi sot se qeveria vendosi të reduktojë zyrat e gjendjes civile në të gjithë Shqipërinë për shkak të shërbimeve online.
Në përfundim të mbledhjes së qeverisë, ministri i Brendshëm, Bledi Çuçi ka folur për miratimin e vendimit që redukton numrin e zyrave të Gjendjes Civile. Në të gjithë vendin do të jenë vetëm 150 zyra për të ofruar ato shërbime ku është e domosdoshme prania fizike e qytetarëve.
Pjesa më e madhe e shërbimeve, do të ofrohen online prej datës 1 maj. Çuçi shpjegoi gjithashtu se dokumentet që do iu duhen qytetarëve për shërbime të ndryshme do të sigurohen vetë nga institucionet publike nga eAlbania.
“Sot miratuam reduktimin e zyrave të gjendjes civile, nga 390 do ketë vetëm 150 zyra si pasojë e revolucionit digjital për dhënien e shërbimeve publike, shërbimet do ofrohen vetëm online. Do ketë 150 sportele për të marrë vetëm ato shërbime që duhet të jetë i pranishëm qytetari, të tjerat online. Do shkëputet shërbimi në sporteli fizik, do të jetë vetëm online me përjashtim të atyre shërbimeve ku duhet të jetë i pranishëm qytetari”, u shpreh Çuçi.
“Institucionet e administratës publike janë të detyruar të sigurojnë vetë dokumentet që u duhen qytetarëve. Nëse një qytetari do i duhet një dokument, dokumentacionin ia siguron institucioni publik përkatës. Prej datës 1 maj do jetë një sasi e madhe shërbimesh që do të ofrohen online, janë rreth 90 shërbime që ofrohen nga Ministria e Brendshme”, tha ministri Çuçi.
