DASH konfirmon mbylljen e ambasadës në Jemen

Departamenti amerikan i Shtetit ka konfirmuar sot se Shtetet e Bashkuara e kanë mbyllur ambasadën në Jemen, për shkak të kushteve të sigurisë dhe ardhjes në pushtet të një grupi rebel.

Gjatë ditës së djeshme, zyrtarët amerikanë kanë thënë në kushte anonimiteti, se misioni amerikan në kryeqytetin Sanaa do t’i pezulloj të gjitha aktivitetet derisa të përmirësohen kushtet.

Punonjësit e ambasadave britanike, franceze dhe gjermane kanë njoftuar gjithashtu se janë duke i përshpejtuar përfundimin e disa procedurave para se të vendosin rreth mbylljes.

Rebelët Huthi e kanë marrë qytetin Sanaa në shtator, ndërsa muajin e kaluar e kanë kapur zyrën presidenciale.

Presidenti Abd-Rabbu Mansour Hadi dhe qeveria e tij, kanë dhënë dorëheqje.