“Dashuri me shikim të parë”
Shtypi rozë është vënë në ndjekje të presidentit francez, Francois Hollande, qysh në momentin që u zbulua lidhja e fshehtë me aktoren Julie Gayet. Ai ka qenë i ndjekur nga paparacët, 24 orë edhe gjatë pushimeve. Vetëm disa ditë ai ka mundur që t’u shpëtojë fotografëve, duke vendosur që të pushojë në Jug të Francës, në sekret të plotë.
Mediat rozë, edhe përgjatë muajit Gusht, në qendër të shkrimeve të tyre kanë pasur Gayet-Hollande dhe pritjen për zyrtarizimin e lidhjes së tyre. Më 12 Gusht, presidenti Hollande festoi edhe 60-vjetorin e ditëlindjes, por Gayet nuk u pa në festën private që ai organizoi, duke mos i uruar “Happy Birthday Mister President”. Autori i librit “Pasioni i Shtetit”, Yves Azèroual, gazetar që është dhe “specialist i marrëdhënieve mes politikanëve dhe personazheve të famshëm”, ka dhënë detaje për lidhjen e shumëpërfolur.
“Julie Gayet është në prag të Po-së së madhe. Së shpejti edhe ajo do të zyrtarizojë prezencën e saj dhe të finalizojë lidhjen me Hollande”, thotë Azèroual.
