Dega e Ibrahim Rugovës shënon 25 vjetorin e themelimit
Dega e Tretë e LDK-së, “Dega e Presidentit Rugova”, Prishtinë, ka festuar sot 25 vjetorin e themelimit të saj.
Kryetari i kësaj dege Arsim Janova tha se Lidhja Demokratike e Kosovës, është njëra nga partitë demokratike postkomuniste më të vjetra në Ballkan, e cila për një çerek shekulli në Kosovë dhe më gjerë ishte shembull dhe avangarde për partitë tjera demokratike të themeluara më vonë.
“Dega jonë është Dega më e privilegjuar e Lidhjes Demokratike në Kosovë, sepse si anëtar i kësaj dege, jetoi dhe veproi themeluesi i Lidhjes Demokratike të Kosovës dhe Shtetit të Pavarur të Kosovës, Presidenti Historik i Kosovës, Dr. Ibrahim Rugova, emrin e të cilit me nderimin më të madh e mbanë sot”, tha në mes tjerash Janova.
Ai më tej është ndalur edhe te historiku i kësaj dege dhe aktivitetet e saj, gjatë periudhës 1990-1999 duke i dhënë mbështetje Deklaratës Kushtetuese të 2 Korrikut dhe 7 Shtatorin – Ditën Kushtetutës së Republikës së Kosovës.
Gjatë këtij solemniteti ata përkujtuan aktivist dhe ish aktivistët e LDK që ranë dëshmorë Prof. Hamdi Gashi, Isa Kastrati, Hajrush Avdullahu, Florim Ymeri, Sokol Sopi, e të tjerë.
Janova ka thënë se partia ka hyrë në proces të zgjedhjeve partiake. Dega e jonë ka bërë të gjitha përgatitjet që procesi zgjedhor të jetë i qetë dhe demokratik. Këtë e kemi dëshmuar për këto 25 vite dhe do ta dëshmojmë edhe tani.
