Deputetja Shamku qorton Nishanin për Kartolinën

Debati për urimin e festës

Pavarësisht se në një atmosferë Krishtlindjesh nuk kanë munguar as “thumbimet” e politikës. Shkak për këtë është bërë Kartolina e postuar nga Presidenti Bujar Nishani me rastin e festës së Krishtlindjeve në faqen zyrtare në ‘Facebook’. “Gèzuar Krishtlindjet” është mbishkrimi i fotos së postuar, që mban tre kurora lulesh e ku në sfond gjendet flamuri kombëtar. Deputetja e PS-së, Ledi Shamku, ka reaguar po në ‘Facebook’, duke e qortuar Presidentin për gabimet gramatikore në këtë kartolinë urimi. “Z. President o Z. President! Shkruhet: “Gëzuar” me “ë” dhe jo me një gjasme-ë, siç e keni shkruar Ju. Këtë gjasme-ë, pikërisht tuajën È, më qëllon ta has shpesh nëpër ‘sms’ që vijnë nga gjysmë-të-shkolluar. Por po e lëmë Ë-në… Z. President, festa quhet (dhe shkruhet) Krishtlindje, jo Krishlindje, siç e keni vënë në kartolinën që sapo u dërguat shqiptarëve. Z. President, a e dini pse shkruhet me “T” dhe jo siç e keni shkruar ju pa “T”? Se është dita kur lind KRISHTI. Krishti o Z. President, jo Krishi. Prandaj dhe Krishtlindje e jo Krishlindje! Eh ç’na ka gjetë…ç’na ka gjetë!!!! Për shumë mot Krishtlindjen, o Z. President!”, shkruan Shamku.