Dhuna në Kuvend, mbyllet shqyrtimi gjyqësor për Ndreun e Ndokën

Është mbyllur sot shqyrtimi gjyqësor për çështjen e Ndreut dhe Ndokës. Në sallën e gjyqit kanë dëshmuar deputeti Paulin Stërkaj dhe një oficer i Gardës së Republikës.

Gjatë dëshmisë së tij, Stërkaj theksoi se nuk ka parë nga afër incidentin ku deputetët u përplasën fizikisht mes tyre në ambientet e Kuvendit. Nga ana tjetër, avokati mbrojtës i Ndreut theksoi se “s’jemi para goditjes për shkak të detyrës”.

Nga ana tjetër ai theksoi se ngjarja në fjalë ka qenë një zënkë mes deputetëve. Ndërkohë, në seancën e radhës pritet të jepet pretenca për dy deputetët. Hetimi ndaj deputetëve Arben Ndoka dhe Pjerin Ndreu nisi pas kallëzimit të dorëzuar më 14 korrik 2014 nga deputeti Edi Paloka, si kryetar i Grupit Parlamentar të PD-së. Në kallëzim thuhet se më 10 korrik 2014, në ambientet e Kuvendit të Shqipërisë, deputetët Ndoka dhe Ndreu kanë goditur për shkak të detyrës deputetin demokrat Genc Strazimiri.