Do të diskutohej Demarkacioni, Mustafa “bojkoton” qeverinë

Ka dështuar mbajtja e mbledhjes së Qeverisë së Kosovës, ku do të shqyrtohej projektligji i Marrëveshjes së Demarkacionit me Malin e Zi.

Raportet në media tregojnë se ekzekutivi kosovar do të mblidhet tani të mërkurën, e njëjta ditë kur bëhet dhe procedimi i Demarkacionit në Kuvend.

Mësohet se ministriat e LDK-së kanë pritur për disa minuta mbërritjen e kryeministrit dhe, në mungesë të tij, takimi është shtyrë.

Mustafa raportohet të ketë qenë në një takim me kreun e PDK-së, Kadri Veselin.

Në Qeverinë e Kosovës nuk kanë treguar, ndërkohë, nëse do të pësojë ndonjë ndryshim projektligji për ratifikimin e Marrëveshjes së Demarkacionit nga versioni fillestar, i cili ishte tërhequr nga kreu i Qeverisë shtatorin e vitit të kaluar.

Projektligji, sipas gazetës “Koha ditore” përmban vetëm 4 nene, përfshirë edhe klauzolën për rishikim të marrëveshjes nëse gjenden fakte të reja.