Dy vëllezër në pranga pas sherrit në Korçë, dy të plagosur

Dy vëllezër, 32 dhe 28 vjeç, kanë përfunduar në prangat e Policisë së Korçës pas një konflikti mes katër personash, që la pas dy të plagosur.

Ngjarja ndodhi rreth orës 19:00, ndërsa dyshohet se konflikti nisi për motive të dobëta.

Gjatë përplasjes, dy prej personave kanë marrë dëmtime të lehta dhe janë dërguar në Spitalin e Korçës për ndihmë mjekësore.

Sherri nuk ka përfunduar vetëm me përplasjen fizike. Gjatë konfliktit është dëmtuar edhe një automjet, të cilit i janë thyer xhamat me një lopatë.

Pas hetimeve, policia ka arrestuar në flagrancë dy vëllezërit, të dyshuar për veprat penale “Plagosja e lehtë me dashje”, “Prishja e qetësisë publike”, kryer në bashkëpunim, si dhe “Shkatërrimi i pronës”.

Materialet procedurale i janë referuar Prokurorisë së Korçës për veprime të mëtejshme.