E përditshmja ”Cumhuriyet” publikon katër faqe të ”Charlie Hebdo”-s

E përditshmja turke e opozitës ”Cumhuriyet” publikoi sot pas një kontrolli policor gjatë natës, katër faqe të numrit të parë të të përjavshmes satirike franceze ”Charlie Hebdo” pas atentateve që përgjakën redaksinë.

Kryesisht përkthyer në turqisht, këto katër faqe, bashkëngjitur të përditshmes, përfshijnë kryesisht artikuj dhe karikatura të ”Charlie Hebdo”-s duke përfshirë dhe faqen kryesore ku shfaqet profeti Muhamed, por në faqet e brendshme.

Në këtë karikaturë të Luz, Muhamedi me lot në sy mban një pankartë “Je suis Charlie”, slogani i mijërave manifestuesve që parakaluan në Francë dhe jashtë vendit për të dënuar sulmet xhihadiste që shkaktuan 17 të vdekur në tre ditë.

Në një artikull të shkurtër editorialisti politik i të përditshmes ”Cumhuriyet” Hikmet Cetinkaya përshkruan në mënyrë të thjeshtë karikaturën.

Ai shton aty disa fjalë në formë editoriali: “E përsëris edhe një herë, terrorizmi është një krim kundër njerëzimit, kushdo qoftë origjina. Për këtë arsye profeti mban në duar një pankartë ”Je suis Charlie”.

Njoftuar të martën nga kryeredaktori i ”Charlie Hebdo”, Gerard Biard, publikimi i këtij numri në Turqi është mbikëqyrur shumë nga autoritetet islamo-konservatore turke, që kanë dënuar shpesh provokimet e të përjavshmes franceze.