Eksperti i Ekonomisë: Koncesioni në Tatime do të ketë fatin e Rapiscan

Eksperti i Ekonomisë, Zef Preçi mendon se koncesioni për menaxhimin e sistemit IT të Tatimeve do të ketë fatin e koncesionit të Doganave. Kompania Rapiscan i merr miliona euro shtetit shqiptar, ndërsa kryen vetëm skanimin e kalimit të mallrave në doganë.

“Personalisht jam i mendimit se një shërbim i tillë i rëndësishëm shtetëror nuk është i nevojshëm të koncesionohet, më ngjan më shumë si një “qokë” apo shpërblim qeveritar për lobistë a kontribuues të mëdhenj fushatash, pa ndonjë lidhje me qëllimin e shpallur zyrtarisht të ndërmarrjes së këtij hapi. Por kjo do të sqarohet në ditët që vijnë…”, thekson ai.

Ai shprehet se qeveria mund të importojë çfarëdo lloj teknologjie të informacionit që dëshiron.

“Qeveria nuk ka asnjë pengesë që ta importojë teknologjinë në fjalë, të trajnojë stafet përkatëse mbi përdorimin e saj si dhe të pajtojë, p.sh., një kompani të huaj të specializuar në këtë fushë, për shërbimin e mirëmbajtjes së teknologjisë gjatë kohës së përdorimit të saj”, thotë për Monitor Preçi, ish-ministër.

Ai deklaron se në një shtet të dobët si Shqipëria, oligarkët kontrollojnë veprimtarinë e Kuvendit dhe diktojnë jetën ekonomike. Sipas tij, privati është gjithnjë i ftuar dhe ky nuk është problemi. Problemi qëndron-mendon eksperti-nëse ky fitim vjen nga respektimi i “rregullave të lojës së ekonomisë së tregut” nga konkurrenca, investimi, dija apo thjesht falë lobingut politik.

“Shqipëria mbetet një vend ku askush nuk mban përgjegjësi për dëmin që ju shkaktojnë interesave publike vendimmarrje të gabuara apo për interesa klienteliste të institucioneve të mandatuara për respektimin e Kushtetutës dhe ligjit. Jam dyshues se edhe ky koncesion do të përsëritë “dobinë” dhe “përfitimet” e njohura të Rapiscan…”, shton ai.

Marrë nga Gazeta Dita