Ekuador, vijojnë kërkimet për të mbijetuar. Tashmë 480 të vdekur

Ekipet e kërkim-shpëtimit vazhdojnë operacionet në Ekuador, ku tërmeti prej 7,8 ballësh i së shtunës shkaktoi nëj katastrofë të vërtetë njerëzore. Autoritetet vendase thanë se, bilanci i viktimave ka shkuar në 480, por fatkeqësisht nuk pritet që kjo të jetë shifra përfundimtare. Ndërkohë, 107 të tjerë rezultojnë të zhdukur, si dhe mbi 4600 të plagosur.

Mediet bëjnë me dije se zona të tëra në vend janë rrafshuar nga tërmeti dhe dyshohet se, me dhjetëra e mbase edhe qindra njerëz të tjerë mund të kenë mbetur nën rrënoja. Tërmeti goditi zonat bregdetare të Paqësorit në Ekuador dhe u konsiderua si lëkundja sizmike më e madhe në dekadat e fundit për këtë vend.

Ndërkohë, ndihma të shumta nga e gjithë bota janë nisur dhe po mbërrijnë në Ekuador në kuadër të përpjekjeve për t’u përballur me pasojat e tërmetit. Ekonomia e Ekuadorit s’është në momentin e saj më të mirë, për shkak të rënies së vazhdueshme të çmimeve të naftës, ndaj dhe çdo ndihmë është e mirëpritur, duke llogaritur që dëmet janë me miliarda dollarë.

Veç kërkimit për të mbijetuarit, shpresa për të cilët pakësohet nga ora në orë, problem tjetër emergjent për autoritetet lokale në zonat e goditura më rëndë është trafiku tejet i rënduar. Tërmeti dëmtoi shumë rrugë dhe shkatërroi dhjetëra mbikalime, duke paralizuar thuajse plotësisht lëvizjen, diçka që ndikon drejtpërdrejt në shpejtësinë e operacioneve dhe cilësinë e ndihmës për të pastrehët, që janë me mijëra.