Abissnet Superiore: Vllaznia feston në “Arenën e Demave”

Kanë përfunduar dy ndeshjet e orës 17:00 në kampionatin Abissnet Superiore. Vllaznia merr një fitore të rëndësishme në kryeqytet, pasi mposht Partizanin 2-0 në “Arenën e Demave”. Kevin Dodaj është heroi i takimit për shkodranët, pasi shënon dy gola në portën e të kuqve.

Një Super Adjesa i dhuron fitoren Egnatias përballë Bylisit. Sulmuesi shënon tre gola në portën e mallakastriotëve, në një sfidë që do ta mbajë mend gjatë.

Ka qenë e bukur dhe plot emocione sfida Partizani-Vllaznia, që u transmetua në RTSH 1. Trajneri Kërnaja ndëshkohet me karton të kuq pas 17 minutash lojë, por Partizani i afrohet golit me Sidibe dhe Human. Edhe Vllaznia rrezikon, por pjesa e parë mbyllet në barazim pa gola.

Pjesa e dytë nis me gol. të kuqtë kalojnë në avantazh me Isgandarlin, por goli anulohet për pozicion jashtë loje. Pak minuta më vonë lojtarit i anulohet një tjetër gol dhe më pas skenën e rrëmben Dodaj, që shënon golin e avantazhit dhe në minutat shtesë shënon sërish golin që vulos fatin e takimit.

Pas këtij suksesi Vllaznia ngjitet në kuotën e 56 pikëve në krye të renditjes, ndërsa Partizani mbetet në kuotën e 44 pikëve në vendin e katërt.

Në sfidën tjetër, në Rrogozhinë rolin e heroit e bën Adjesa që shënon 3 gola në portën e Bylisit në pjesën e dytë, për të vulosur suksesin 3-0 të Egnatias përballa ballshiotëve.

Egnatia ngjitet në kuotën e 54 pikëve, ndërsa Bylisi mbetet 30 pikë në klasifikim.

The post Abissnet Superiore në RTSH/ Vllaznia feston në “Arenën e Demave”,  super Adjesa mposht Bylisin appeared first on RTSH.