Erdogan: Gulen kërcënim më i rëndë për sigurinë se PKK-ja
Lëvizja e imamit, Fethullah Gulen përbën një kërcënim më të rëndë për sigurinë e Turqisë se rebelët e Partisë së Punëtorëve të Kurdistanit (PKK), theksoi presidenti turk, Recep Tayyip Erdogan cituar sot nga media.
“Sot, në plan ndërkombëtar, vetë organizata terroriste PKK nuk ka shkaktuar aq dëme për Turqinë sa struktura paralele e Gulen”, theksoi Erdogan për gazetarët që e shoqëronin në vizitë zyrtare në Kolumbi.
Presidenti turk akuzoi ish-aleatin e tij Gulen se kishte krijuar një rrjet marrëdhëniesh të pista me komunitetin ndërkombëtar me qëllimin e vetëm për të denigruar qeverinë islamo-konservatore në krye të Turqisë që prej vitit 2002.
Përbërë nga një sistem galaktik shkollash, OJQ-sh, mediash apo ndërmarrjesh, lëvizja e imamit Gulen, i cili jeton në SHBA që prej vitit 1999, ka mbështetur regjimin e Erdogan kundër ushtrisë dhe elitës laike të vendit.
Por burri i hekurt i vendit i shpalli atij luftë të plotë një vit më parë si pasojë e një skandali të madh korrupsioni që përfshiu gjithë rrethin e tij.
Erdogan akuzoi Gulen se kishte ngritur akuza për ta dëmtuar dhe se kishte ndërtuar një shtet paralel të destinuar për ta rrëzuar. Ai u kundërpërgjigj duke urdhëruar dënime masive dhe hetime kundër të gjithë bashkëpunëtorëve të afërt të organizatës guleniste.
