Eurozona pranon nën kushte zgjatjen me katër muaj të ndihmës financiare të Greqisë

Zona euro vendosi të zgjasë me katër muaj planin e ndihmës financiare të Greqisë, nën kushte, veçanërisht që Athina të paraqesë deri të hënën një listë reformash që duhet të miratohen nga kreditorët.

“Katër muaj, është afati i dhënë përsa i përket financimit dhe duke marrë parasysh sfidat e Greqisë”, theksoi Jeroen Dijsselbloem, presidenti i Eurogrupit gjatë një konference shtypi dje në mbrëmje në Bruksel.

“Në bazë të kërkesës greke, angazhimeve të autoriteteve greke, mendimeve të institucioneve kreditore të Athinës dhe marrëveshjes së arritur dje mes vendeve të zonës euro ne do të nisim procedurat në kuadër të arritjes së një vendimi përfundimtar për zgjatjen e planit aktual të financimit me një afat deri në katër muaj”, theksoi komunikata përfundimatare e Eurogrupit.

”Si kusht, Greqia duhet të paraqesë një listë reformash deri të hënën. Insitucionet BE, BQE dhe FMN do të japin menjëherë mendimin e parë për të thënë nëse kjo është e mjaftueshme si pikënisje”, theksoi eurozona në një komunikatë.