Fondi i Ballkanit Perëndimor, marrëveshja nxit procesin e integrimit

Komisioni i Politikës së Jashtme miratoi të hënën ratifikimin e marrëveshjes për themelimin e “Fondit të Ballkanit Perëndimor dhe statutit të tij”. Në prezantimin e projektit, ministri i Jashtëm, Ditmir Bushati, theksoi se ratifikimi i kësaj marrëveshje synon financimin e projekteve të vogla dhe të mesme në fusha të ndryshme, ku secili prej shteteve do të ketë një buxhet prej 30 mijë euro. Përmes këtij Fondi, synohet nxitje e proceseve të integrimit europian, mbështetur në modelin e Grupit të Vishegradit, tha ministri.
Nga ana jonë ka pasur një rol aktiv, nënvizoi ai, për të promovuar nismën edhe në kuadër të Presidencës së ECPS-ë, për të punuar edhe për infrastrukturën, për të vënë në dispozicion ambientet edhe burimet njerëzore. Eshtë rënë dakord që drejtori i parë ekzekutiv, të jetë shqiptar, me një mandat 3-vjeçar, spjegoi Bushati.
Ndërsa, kryetarja e komisionit, Arta Dade, tha se është parashikuar kohë më parë që Tirana do të jetë kryeqyteti për krijimin e Fondit të Ballkanit Perëndimor, në kuadër dhe të nismave të reja dhe angazhimit serioz që ka Republika e Shqipërisë për bashkëpunimin rajonal.

Kjo marrëveshje u ratifikua sot dhe nga Komisioni Parlamentar i Ligjeve dhe Komisioni i Integrimit.