“Forumi Ekonomik i Tiranës”, platformë dialogu për të ecur më shpejt në funksion të fuqizimit të ekonomisë

Kështu u shpreh sot Kryeministri Edi Rama, duke përshëndetur punimet e këtij forumi, i cili është modeluar pak a shumë si forumi i Delfit.

Kryeministri propozoi një bashkëpunim me forumin e Delfit, në mënyrë që siç tha ai “të përfitojmë nga dija, njohuritë dhe përvoja e tij dhe të zgjerojmë forumin e Tiranës, që këto dy forume të ndërlidhen dhe të organizojnë edhe hapa vijues”.

“Nëse arrijmë ta bëjmë një gjë të tillë, patjetër që mund ta fusim forumin e Tiranës më tepër në hartë dhe të krijojmë një forum që bëhet destinacion për nëpunësit civil dhe aktorët privatë që do të duan të mblidhen për të diskutuar çështje dhe tema të caktuara”, tha Rama.

Kryeministri u shpreh se shpreson shumë që ky vit të jetë i mirë si për BE-në, ashtu edhe për Shqipërinë dhe rajonin. “Kjo mund të shërbejë gjithmonë e më tepër si themel për zhvillimin ekonomik dhe përmirësimin e jetës së qytetarëve tanë”, tha Rama.

Kreu i Qeverisë u ndal po ashtu edhe te bashkëpunimi rajonal, ndërsa kërkoi që të diskutohet mundësia se si të fokusojmë Forumin Ekonomik të Tiranës në çështje të bashkëpunimit rajonal dhe përmirësimin e ekonomisë tonë si rajon.

“Për shumë vite, Forumi i Vjenës është mbështetur në këtë parim dhe ka mundur të bëjë bashkë liderë të rajonit. Tani ka ardhur koha të kalojmë nga qëndrime dhe ide fisnike në diskutime më konkrete dhe hapa konkretë. Ne jemi tregje të vegjël, nëse nuk jemi të ndërlidhur. Madje Greqia që është një shtet i madh në vetvete përbën një treg të vogël”, tha Rama.