Gazetaria investigative, artikulli mbi Trump fiton çmimin Pulitzer

Një hetim gazetaresk ndaj premtimeve të Donald Trump për mbështetje të kauzave të bamirësisë gjatë fushatës presidenciale ka fituar çmimin Pulitzer.

“Artikujt e gazetarit të “Washington Post”, David Fahrenthold, krijuan një model të ri gazetarie transparente dhe ngritën dyshime mbi pohimet e bamirësisë të zotit Trump”, deklaroi bordi që i dha çmimin gazetarit.

Përmes investigimit të tij, gazetari Fahrenthold zbuloi edhe komentet e turpshme të Trump për gratë në një regjistrim të vitit 2005. Pulitzer është çmimi më prestigjoz në gazetarinë amerikane.

Fahrenthold filloi të hetonte pasi Trump premtoi se do të dhuronte 6 milionë dollarë për organizatat e veteranëve ushtarakë dhe zbuloi se, vërtet ky premtim i tij ishte mbajtur, por deklaratat e mëparshme për aktivitetet filantrope të tij ishin ekzagjeruar.

Fitues të tjerë të çmimit Pulitzer ishin gazetarë të mediave “The New York Daily News” dhe “ProPublika”, një platformë online e specializuar në gazetari investigative, që zbuloi abuzimet e policisë ndaj komuniteteve të varfëra dhe minoriteteve etnike, të cilat u detyruan të braktisnin shtëpitë e tyre.