“Gërdeci”, Gjykata e Strasburgut vendos dëmshpërblim për Delijorgjin

Gjykata e Strasburgut ka vendosur dëmshpërblim me 15600 euro për Mihal Delijorgjin. Dëmshpërblimi i është caktuar për paraburgimin përtej afateve ligjore. Delijorgji kishte ankimuar mbajtjen në burg jashtë afateve.

Mihal Delijorgji, ish administratori i “Albademil”, u dënua nga gjykata si një nga përgjegjësit e tragjedisë së 15 marsit 2008 në Gërdec. Por në 2013 Gjykata e Tiranës pranoi kërkesën e tij, për ulje dënimi. Gjykata i “fali” Delijorgjit 70 ditë burgu, çka bëri që ai të rifitonte lirinë. Në një intervistë për “GSH”, Mihal Delijorgji, tha se Gërdeci nuk ishte aksident, por sabotazh.

Delijorgji ka mbyllur kështu çdo llogari me drejtësinë për tragjedinë e Gërdecit, ku humbën jetën 26 persona dhe u plagosën rreth 300 të tjerë, si pasojë e shpërthimit të një fabrike demontimi të municioneve në Gërdec.