Gjyqi ndaj Frrokut, dëshmitari konfirmon pjesëmarrjen në vrasjen e kryekomisarit
Zhvillohet seanca ndaj Arben Frrokut, të akuzuarit për vrasjen e kryekomisarit Dritan Lamaj. Dëshmitari kyç i ngjarjes, Fatmir Vladi, nëpërmjet një video- konference ka rithënë përpara trupit gjykues atë që pretendon se ka parë natën e krimit, ku Lamaj mbeti i vrarë në mënyrë mafioze.
Vladi thotë se Arben Frroku ka qenë në automjetin e personave që vranë kryekomisarin. Pavarësisht kësaj, biznesmeni Arben Frroku mohon përfshirjen në vrasjen Lamajt, ndonëse kanë pasur konflikte të shpeshta me njëri-tjetrin.
Seanca ka nisur në orën 10:10, të paradites së sotme, me dyer të mbyllura. Dritan Lamaj mbeti i vrarë nga një breshëri plumbash më 24 shkurt 2013, pranë banesës së tij. Prokuroria thotë se ka siguruar dëshmitarin kyç të ngjarjes dhe prej një viti askush nuk e ka ditur identitetin e tij.
Disa javë më parë, Arben Frroku publikoi emrin e Fatmir Vladit, duke e akuzuar për mashtrim. Ndërkaq, persona ende të paidentifikuar kishin vendosur një sasi eksplozivi poshtë automjetit të dëshmitarit, i cili u gjet nga një punonjës i servisit.
Policia bëri të mundur largimin e lëndës plasëse nga makina, duke shpëtuar jetën e Fatmri Vladit.
