Informaliteti, në Durrës regjistrohen 1300 biznese të reja

Aksioni kundër informalitetit vijon me intensitet në Durrës, ku vetëm gjatë këtij muaji janë regjistruar 1300 biznese të reja. 47 grupe kontrolli janë shpërndarë në të gjithë territorin e rajonit të Durrësit, që përfshin dhe Kavajën e Krujën, duke kryer rreth 6000 inspektime.

Drejtuesja e Drejtorisë Rajonale të Tatimeve në Durrës, Valbona Sako shprehet e kënaqur nga reagimi pozitiv i subjekteve. Por, vetë subjektet, që kanë inventar malli të pafaturuar, po dhe zejtarët e vegjël, ndjehen të pakënaqur. Një pjesë e tyre ka ndërprerë aktivitetin ose ulin e ngrejnë qepenat në varësi të pranisë së kontrollorëve në zonë. Ka dhe nga ata që sfidojnë duke ngritur çmimet e produkteve dhe tregtuar pa kupon tatimor.

Në një treg ende kaotik, të tjera biznese të vogla nuk guxojnë të furnizohen me mall të ri nga frika e konfiskimit. Jashtë kameras ata shprehen se furnitorët me të cilët kanë punuar deri tani nuk i pajisin me fatura të rregullta, ndërsa ndëshkimi i tatimorëve bie mbi ta. Gjatë shtatorit u është konfiskuar malli 71 subjekteve, kryesisht veshje dhe ushqime.

Lidhur me shqetësimin e tregtarëve të tregjeve agroindustriale në Durrës e Kavajë, Sako deklaron se statusi i ambulantit që kërkohet nga këta tregtarë bie, pasi këto subjekte ushtrojnë veprimtarinë e tyre në vende të përcaktuara.

Megjithatë, aktualisht po diskutohet mbi përcaktimin e statusit të këtyre tregtarëve që punojnë me orar të kufizuar, ashtu si dhe të zejtarëve me një marzh të ulët fitimi.