Integrimi në BE, Gjosha kërkon mbështetje nga Serbia dhe Mali i Zi

Ministrja e Integrimit Europian Klajda Gjosha, priti sot në një takim, dy Kryenegociatorët e Serbisë dhe Malit të Zi, vende të cilat negociojnë për t’u bërë anëtare me Bashkimin Europian.

Gjatë takimit me Tanja Miscevic, kryenegociatore e Serbisë dhe Aleksandar Pejović, kryenegociator i Malit të Zi, u diskutua mbi rëndësinë e procesit të integrimit të vendeve të Ballkanit Perëndimor në Bashkimin Europian dhe rolin tejet të rëndësishëm që ka gjithëpërfshirja e aktorëve.

Ministrja Gjosha, u shpreh se Shqipëria shpreson të  hapë sa më shpejt negociatat me BE-në, duke e cilësuar si fazën më të rëndësishme të procesit të integrimit të vendit.

“Ne jemi të vetëdijshëm që është një fazë që para së gjithash kërkon ngritjen e  kapaciteteve, përgatitjen e  gjithë shoqërisë shqiptare, ndaj çdo asistencë dhe mbështetje nga vendet të cilat kanë kaluar përpara nesh këtë proces ka shumë vlerë”, tha Ministrja Gjosha.

Ministrja Gjosha  u shpreh se Ministria e Integrimit Europian është në proces të finalizimit të Dokumentit për hapjen e negociatave, një dokument ky, thelbësor

i cili do të mundësojë krijimin e të gjitha strukturave negociuese. Ministrja kërkoi asistencë nga dy Kryenegociatorët, për të ndarë modelet më të mira që ata kanë përdorur.

Kryenegociatorët e Serbisë dhe Malit të zi, shprehën gatishmërinë për të mbështetur Shqipërinë në nivel teknik, si dhe duke ndarë eksperiencën e tyre në procesin e negociatave.