INUK vijon aksionin në Tiranë, sot prishen ndërtimet pa leje te “Nënë Tereza”
Prishja e ndërtimeve pa leje nga ana e Inspektoratit Ndërtimor Urbanistik Kombëtar ka vijuar edhe paraditen e të shtunës në disa zona të Tiranës.
Burime të Agjencisë Telegrafike Shqiptare pranë INUK bënë të ditur se aksioni është shtrirë në disa segmente të caktuara të kryeqytetit. “Kemi një plan të mirëpërcaktuar punimesh dhe zonash të zaptuara pa leje nga qytetarët, të cilat do të rivihen në dispozicion në të tyre”, thane burimet.
Sipas tyre, puna ka nisur që herët në mëngjes. “Kemi nisur punën nga zona e Universitetit Politeknik të
Tiranës, ku ka ende disa objekte pa leje për t’u larguar. Në këtë zonë edhe më herët është bërë një ndërhyrje për t’i hapur rrugë ristrukturimit të Sheshit “Nëne Tereza” në kuadër të vizitës së Papa Françeskut në Tiranë”, thanë burimet duke shtuar se sot është faza e dytë e kësaj pjese.
Aksioni, sqaruan burimet, do të shtrihet edhe në zonën e “Unazës së re” deri në “Mëzez”. INUK para disa ditësh ndërhyri edhe në një treg në rrugën “Hoxha Tasim”.
Sipas INUK, rreth 30 tregtarë, që prej disa vitesh ushtrojnë aktivitetin e tyre në tregun e në rrugën “Hoxha Tasim”, kanë vepruar në mënyrë vullnetare duke çmontuar strukturat e ngritura për tregtimin e fruta-periemve. INUK thotë se ky treg, që ishte i vendosur në mes të kryqëzimit të rrugëve, është jashtë standardeve dhe normave higjieno-sanitare. INUK bën me dije se aksionet do të vazhdojnë deri në në çlirimin e plotë të hapësirave publike.
