Itali, shqiptari masakron me thikë gruan e dytë brenda 13 vitesh

Një shqiptar 53 vjeç, Asllan Agaj, ka vrarë dje pasdite me thikë bashkëjetuesen e tij 31-vjeçare, mamanë e 3 fëmijëve në Komunën Sutri, në Viterbo të Italisë.

Sipas mediave italiane, bëhet fjalë për 31-vjeçaren Brunilda Hoxha, e cila kishte marrë gjashtë goditje me thikë, pesë në stomak dhe një në fyt. Hoxha ishte nëna e tre fëmijëve të mitur, dy djem 7 dhe 14 vjeç dhe një vajzë, 12 vjeç.

Pas vrasjes, 53 vjeçari ka tentuar të vrasë edhe veten duke pirë ilaçe dhe prerë damarët. Ai ka njoftuar menjëherë karabinierët, të cilët kanë mbërritur  në banesën e çiftit, në qendër të komunës së vogël, ku kanë gjetur gruan të pajetë e në krah saj burrin pa ndjenja.

Nga hetimet e kryera deri tani, ka dalë që rreth 13 vjet më parë, shqiptari kishte vrarë gruan e tij të parë. Episodi atëherë ndodhi në Kave, një provincë e Romës, në vitin 2001, ku ish-bashkëshortja u qëllua me kazmë për vdekje.

Hetuesit dolën në përfundimin se arsyeja e krimit para 13 vjetësh ishte xhelozia. Martesa mes Agaj dhe gruas së tij pas 20 vitesh kishte hyrë në krizë. Grindjet mes çiftit, shumë herë nga të cilat të dhunshme, ishin të përditshme. Dhe pikërisht grindja e radhës arriti kulmin, ku burri mori një kazmë dhe e vrau të shoqen.

Pastaj, pikërisht siç bëri edhe dje në Sutri, pasi kishte qëlluar me thikë 31-vjeçaren, njoftoi karabinierët dhe u dorëzua.

Gjykata e Tivolit, në vitin 2003 e dënoi me 16 vjet burg. Dënimi iu ul në 14 vjet nga Gjykata e Apelit në Romë. Në vitin 2012, pasi kishte bërë 9 vjet burg, Agaj iu kthye lirisë.