Ivanov: Mund të presim maksimalisht 2 000 migrantë

Maqedonia mund të akomodojë maksimalisht një kontigjent prej 2 000 refugjatësh, deklaroi presidenti maqedonas, Gjorgje Ivanov duke reaguar ndaj njoftimit të Bashkimit Evropian të krijimit të 100 mijë vendeve pritëse për refugjatët në Greqi dhe në Ballkan për menaxhimin e krizës migratore.

“Kapaciteti akomodues i Maqedonisë është 2 000 refugjatë maksimalisht në bashkëpunim me UNHCR-në dhe Kryqin e Kuq”, deklaroi Ivanov në Bruksel për median maqedonase, që publikoi sot deklaratat e tij.

Krerët e shteteve ose të qeverive të 10 shteteve anëtare (Gjermania, Austria, Bullgaria, Kroacia, Greqia, Hungaria, Luksemburgu, Holanda, Rumania dhe Sllovenia) por gjithashtu të tri vendeve që nuk bëjnë pjesë në Bashkimin Evropian, Shqipëria, Maqedonia dhe Serbia u takuan dje në Bruksel për të shqyrtuar mënyrat e frenimit të krizës migratore të paprecedentë që po trondit Evropën.

Me 100 mijë vende pritëse, Greqi ka pranuar të krijojë me ndihmën e Komisariatit të lartë për Çështjen e Refugjatëve (UNHCR-ja), 30 mijë vende akomoduese deri në fund të vitit. Në një etapë të dytë, 20 mijë vende të tjera do të krijohen, me subvencione nga UNHCR-ja.