Jaka: Biznesi ynë duhet të jetë pjesë e tregut global

Kryetari i Dhomës së Tregtisë dhe Industrisë Tiranë, Nikolin Jaka dhe drejtori i Përgjithshëm i Akreditimit, Armond Halebi, nënshkruan sot marrëveshjen e bashkëpunimit mes këtyre dy institucioneve.
Bazuar në këtë marrëveshje, Drejtoria e Përgjithshme e Akreditimit do të mbështesë biznesin me informacione mbi çertifikimin, testimin, inspektimin dhe akreditimin, si dhe për çështje që kanë të bëjnë me barrierat teknike në tregëti dhe rolin që luan akreditimi në lehtësimin e këtyre barrierave.
Biznesve që shpesh përballen me problematikat në përzgjedhjen e çertifikimit dhe organizmave që duhet ta kryejnë atë, Drejtoria e Përgjithshme e Akreditimit shpreh angazhimin e saj që nëpërmjet Dhomës së Tregtisë dhe Industrisë Tiranë, të informojë dhe ndihmojë në përzgjedhjen e organizmit të duhur.
Për këtë, do ju kërkohet bizneseve që para se të vendosin të çertifikojnë bizneset e tyre të kontaktojnë me Dhomën e Tregtisë dhe Drejtorinë e Përgjithshme të Akreditimit në mënyrë që të shmangin çertifikimin nga kompani të paakredituara, e cila sjell dhe mosnjohje të çertifikatave që këto të fundit lëshojnë.
Gjithashtu DPA për çështje që kanë të bëjnë me akreditimin do të ofrojë trajnime dhe seminare, me qëllim informimin e biznesit për të gjithë problematikat që lidhen me këtë fushë.
Kryetari i Dhomës së Tregtisë Tiranë, Jaka u shpreh pas nënshkrimit të kësaj marrëveshje se sa e rëndësishme është që biznesi shqiptar të jetë pjesë e tregut europian dhe global dhe se çertifikimi i produktit shqiptar është shumë i rëndësishëm për të qenë pjesë e këtij tregu.

Nga ana e tij, drejtori i Akreditimit, Halebi u shpreh se tek kjo drejtori,  biznesi do të marrë të gjithë informacionin e duhur dhe suportin për të qenë në nivel më vendet e tjera të BE-së.