Japonia ndryshon ligjet ushtarake, reagon Kina

Dhoma e ulët e Parlamentit japonez ka miratuar dy projektligje të debatueshme që ndryshojnë ligjet për sigurinë kombëtare të vendit, pavarësisht protestave të mbajtura në Tokio.

Ndryshimet në fjalë lejojnë trupat japoneze që të luftojnë në vende të tjera të botës, për herë të parë që nga Lufta e Dytë Botërore.

Megjithatë projektligjet duhet ende të votohen nga dhoma e lartë, por gjasat janë që ata të kalojnë edhe në këtë instancë.

Por ndryshimet në fjalë konsiderohen antipopullore dhe mijëra qytetarë protestuan të mërkurën jashtë selisë së Parlamentit kundër tyre.

Kryeministri Shinzo Abe ka kërkuar me ngulm miratimin e dy pr/ligjeve, me argumentin se është i nevojshëm zgjerimi i doktorinës ushtarake të quajtur “vetëmbrojtja kolektive”.

Por sondazhet tregojnë se gjysma e qytetarëve japonezë i refuzojnë ato.

Duke reaguar ndaj miratimit të parë të pr/ligjeve, Ministria e Jashtme kineze shprehu dyshimin nëse, Japonia po braktis politikat paqësore dhe i bëri thirrje asaj që të ndjekë shtegun e zhvillimeve pacifiste që nuk dëmtojnë stabilitetin e rajonit.

Ndërsa më parë ka qenë Korea e Jugut që i bënte thirrje Japonisë që të kontribuojë në paqen dhe sigurinë rajonale, duke i kërkuar transparencë në bisedimet politike në fushën e mbrojtjes.