Juncker: S’ka euro po nuk pati “Schengen”

Presidenti i Komisionit Europian, Jean-Claude Juncker ka bërë një deklaratë të fortë këtë të mërkurë, kur theksoi se projekti i monedhës së përbashkët europiane do të rrezikohej, nëse do të shthurej zona e lëvizjes së lirë “Schengen”, për shkak të rivendosjes së kontrolleve ndërkufitare nga vendet anëtare të saj për të mbajtur larg refugjatët.

Zona “Schengen” e përbërë nga 26 anëtarë është vendosur nën një presion të madh që prej verës së këtij viti, kur qindra e mijëra emigrantë që u largoheshin luftrave dhe varfërisë në Lindjen e Mesme dhe Afrikë, mësynë kontinentin e vjetër përmes kufijve jugorë dhe juglindorë në kërkim të një jete më të sigurtë në Europë”.

Duke qenë se Greqia, veçanërisht, po vuan të frenojë valën e refugjatëve, vende të tjera si Hungaria dhe Danimarka kanë rivendosur kontrollet e përkohshme kufitare për të ndalur fluksin e refugjatëve, duke e bërë udhëtimin e lirë pa pasaporta më të vështirë, madje duke shënuar rekord në dekadat e fundit.

Duke folur përpara Parlamentit Europian në Strasburg, Juncker paralajmëroi se, nëse lejohet shembja e sistemit të “Schengen”-it, kjo do të kishte pasoja politike për projekte të tjera të Bashkimit Europian, përfshi edhe monedhën e përbashkët Euro.

“Nëse Schengeni do të na lërë, do të humbasim më shumë sesa vetëm një lëvizje të lirë. Monedha e përbashkët europiane nuk do të kishte aspak kuptim, nëse Schengeni nuk do të ekzistonte. Zona në fjalë është një prej gurëve të themelit të asaj çfarë po ndërton Europa”, tha Juncker. “Sistemi i Schengenit është pjesërisht në koma, – shtoi ai. – Ata që besojnë në Europën dhe vlerat e saj, në parimet dhe liritë e saj, duhet të përpiqen e të përpiqen për të rikthyer shpirtin e Schengenit”.

Kjo deklaratë e Junckerit është cilësuar kryesisht politike sa i përket rëndësisë së saj, që kur zona “Schengen” – e cila ka 22 vende anëtare nga BE dhe 4 nga jashtë saj, – është ligjërisht e dallueshme nga grupi i monedhës së përbashkët me 19 anëtarë.

Gjithsesi, paralajmërimi i tij reflekton shqetësimin në rritje në selinë e BE-së në Bruksel, se tensionet e brendshme në BE për shkak të krizës së emigrantëve mund të shënojë një themelim të gjerë rrugëtimit post-Luftës së Dytë Botërore për unitetin europian.