Këndi i Librit Arbëresh, hap historik në Institutin Albanologjik
Në RTK-së, në një lidhje të drejtpërdrejtë ishte Naim Berisha, ushtrues detyre i drejtorit të Institutit Albanologjik në Prishtinë, për të diskutuar mbi këndin e ri të librit arbëresh, i cili tashmë ka zënë vend në këtë institut.
“Para disa ditësh, patëm një vizitë nga dy bashkëveprimtar që jetojnë në Evropë, Rexhep Rifati dhe Musa Hykolli, të cilët i falënderoj shumë për donacionin që na kanë dhënë. Edhe pse si institut kemi qenë gjithmonë të kujdesshëm dhe të përkushtuar në hulumtimet tona për studimet arbëreshe dhe më gjerë, ky donacion është një ndihmë e madhe,” u shpreh Berisha.
Ai shtoi se ky kënd i librit arbëresh në bibliotekën e Institutit Albanologjik është një arritje e veçantë.
“Nuk mund të themi se kemi një numër të madh librash, por mendoj se ky kënd është shumë domethënës. Për herë të parë në historinë e institutit, të gjitha kontributet dhe librat që lidhen me arbëreshët janë grumbulluar në një hapësirë të dedikuar,” tha Berisha.
Ky zhvillim shënon një hap të rëndësishëm për ruajtjen dhe promovimin e trashëgimisë kulturore arbëreshe, duke krijuar një mundësi të vlefshme për studiuesit dhe hulumtuesit e kësaj fushe.
