Dy vëllezër në gjendje të dehur sherr në spital me policët, arrestohen
Dy vëllezër në Durrës kanë përfunduar në prangat e policisë për prishje të rendit dhe qetësisë në spital.
Uniformat blu kanë arrestuar shtetasit Florenc Calamani 31 vjeç dhe Dajlan Calamani 25 vjeç.
Arrestimi i tyre u bë pasi “më datë 28.12.2016, rreth orës 17:45, në gjendje të dehur, kanë prishur rendin dhe qetësinë në ambientet e Spitalit Rajonal Durrës”.
Me të marrë njoftimin menjëherë në vendngjarje kanë shkuar efektivët e Policisë, me qëllim qetësimin e situatës.
Policia thotë se “dy vëllezërit nuk i janë bindur uniformave blu dhe në vijim janë shoqëruar në ambientet e Komisariatit të Policisë”.
Pasi janë shoqëruar, dy vëllezërit kanë kundërshtuar dhe goditur për shkak të detyrës punonjësit e policisë.
Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale”Kundërshtimi i punonjësit të policisë së rendit publik në bashkëpunim” dhe ”Goditjet për shkak të detyrës”.
