Kinezët forcojnë pozitat në Ballkan; Cosco blen pjesën më të madhe të Portit të Pireut

Gjiganti kinez COSCO përfundoi zyrtarisht blerjen e pjesës më të madhe të Portit të Pireut, duke deklaruar se do ta kthejë atë në portin më të madh të kontejnerëve të tranzitit në Europë.

Në total, kompania do të investojë 293.8 milionë euro, që janë pjesë e projekteve 5-7-vjeçare të Kinës për të shtrirë ndikimin e saj në Europë, por edhe në Ballkan.

Cosco parashikon që ta kthejë Portin e Pireut në portin më të madh në Europë për kontejnerët tranzië, atë të kroçierave, si dhe për riparimin e pajisjeve nënujore.

Synimi i Kinës është që të ngushtojë distancat mes saj dhe Europës Juglindore, ku bën pjesë edhe Shqipëria.

Në vitet e fundit, Kina po tregon interes në rritje për të investuar në projekte energjetike dhe infrastrukturore në Ballkan. Ajo po synon të lidhë Europën me Azinë përmes Rrugës së re të Mëndafshit.

Në Shqipëri nuk ka ende një projekt konkret, përveç diskutimeve për “Rrugën e Arbërit”, edhe pse vendi ynë është pjesë e inicitivës “16+1” (që përfshin 16 vende të Europës Juglindore plus Kinën).

Në simpoziumin e mbajtur në ambasadën kineze në Tiranë, për atë që njihet si projekti “Belt and Road” u nënvizua se si Kina ashtu edhe Shqipëria janë në faza të rëndësishme zhvillimi, megjithatë dy vendet kanë nevojë të përmirësojnë bashkëpunimin, të mësojnë prej njëri-tjetrit, si dhe të plotësojnë avantazhet.

Në fakt, kinezët kanë shprehur vazhdimisht interes për të qenë pjesë e investimeve në infrastrukturë, përfshi këtu edhe ato në hekurudhën shqiptare, por propozimet janë lënë në hije.

Ndryshe po ndodh me shtete si Greqia, Maqedonia e Serbia, që janë pjesë direkte e planeve kineze të investimeve në rajon.

Megjithatë, vendet e tjera të Ballkanit, përfshi këtu edhe Shqipërinë, synojnë të tërheqin ndonjë pjesëz.

Vendi ynë konsiderohet më shumë i orientuar ndaj marrëdhënieve me Bashkimin Europian, por veçanërisht në katër muajt e parë të vitit 2016 u vu re një forcim i marrëdhënieve mes dy vendeve. Në mars të këtij viti, Kina u rendit si partneri i dytë tregtar në vend, duke zënë 7.7% të tregtisë së jashtme.