Konflikte brenda BDI-së në Kumanovë

Vlime dhe konflikte brenda degës së BDI-së në Kumanovë, që kulmuan ditëve të fundit edhe me një incident midis grupacioneve rivale. Gjithçka ka si synim ka pretendimin për të marrë kreun e kësaj partie, pasi që tashmë edhe në këtë degë problematike me vite të tëra nuk janë organizuar zgjedhje dhe nuk ka pasur kuvend zgjedhor.

Dega aktuale udhëhiqet nga kryetari që është në cilësinë e ushtruesit të detyrës, Ulusi Beqiri, i cili mban këtë pozitë më shumë se 6 vite. Dega e Kumanovës nuk ka mbajtur kuvend të rregullt zgjedhor që nga viti 2005 dhe se vazhdimisht ishin emëruar kryetar dege me pozitën e ushtruesve të detyrës. Tentimet për të mbajtur kuvende kishin dështuar për shkak të konflikteve të brendshme dhe rrymave partiake për të marrë fronin e kësaj partie. Mirëpo paralajmërimi për zgjedhje të reja ka nxitur debatet dhe mobilizimin e një pjese të madhe të krerëve lokal dhe anëtarësisë.

Burime të afërta pranë kësaj partie kanë theksuar për INA se janë grupacione të ndryshme, që synojnë të marrin drejtimin e partisë. Njëri krah përbëhet nga grupimi i Beqirit dhe krahu tjetër nga një grup ish-ushtarësh të UÇK-së, që sfidojnë për të marrë kryesimin e degës. Por janë edhe pretendime të tjera që kalkulojnë në mbështetjen që do të marrin nga lideri i BDI-së, Ali Ahmeti.

“Po janë të arsyeshme kërkesat për të pasur një kryesi të re dhe për ti dhënë hapësirë njerëzve dhe kuadro të dëshmuara, sepse deri tani kemi një monopolizim të skajshëm dhe grupim që përfiton në çdo pazar apo kalkulim të brendshëm partiak, si në emërime, punësime dhe çështje tjera”, thekson për INA, një aktivistë partiak, i cili nuk dëshiron të prononcohet për shkak të rrezikimit të pozicioneve të tij brenda kësaj partie.

Situata e ngjashme ndodhë edhe në degë të tjera të kësaj partie, ku kryetarët nuk kanë votëbesimin e fituar nga anëtarësia