Kosova ka përmbushur obligimet për liberalizimin e vizave

Zëvendëskryeministri Hashim Thaçi është takuar me drejtorin për Ballkanin Perëndimor në Drejtorinë e Përgjithshme për Politikën Evropiane të Fqinjësisë dhe Negociatave për Zgjerim në Komisionin Evropian, Jean-Eric Paquet me të cilin ka diskutuar për rrugën e Kosovës drejt BE-së.

Thaçi në rrjetin social Facebook, ka thënë se Kosova mbetet e përkushtuar në përmbushjen e obligimeve të saj në rrugën drejt BE-së dhe pret që të njëjtin përkushtim ta tregojë edhe BE-ja në qasjen ndaj Kosovës.

“Nënshkrimi i MSA-së dhe liberalizimi i vizave u përmenden si dy fusha në të cilat Kosova ka përmbushur obligimet e veta dhe tash pret që edhe Brukseli të njohë këto të arritura dhe t’i shpërblejë në mënyrë meritore. Z. Paquet konfirmoi se Brukseli do të vazhdojë të përkrahë dhe asistojë Kosovës me të gjitha instrumentet që ka në dispozicion”, ka shkruar Thaçi.