Kriza, bien dhe blerjet e gurëve të çmuar në Shqipëri

Ndonëse 10 vitet e fundit kanë nisur të shiten gurë të çmuar dhe diamante edhe në vendin tonë, tregu në Shqipëri është ende shumë i vogël, pohojnë disa nga argjendaritë kryesore për Monitor.
Drejtuesit e argjendarive pohojnë që më tepër kërkesa për blerje gurësh të çmuar ose bizhuterive të formuara me to, ka në raste festash ose në verë, megjithatë, këta blerës përbëjnë një përqindje shumë të vogël krahas totalit.
Në tremujorin e tretë 2015, importi i gurëve të çmuar ka pësuar një rënie prej 17 %, sipas vlerës, në kerhasim me të njëjtën periudhë të një viti më parë. Sipas INSTAT, gjatë tremujorit të tretë të vitit 2015, janë importuar 276 mln lekë perla, gurë dhe metale të çmuara, nga 328 milionë lekë të njëjtën periudhë të një viti më parë.
Argjendaritë pohojnë se në përpjekje për të tërhequr turistët e huaj kryesisht, mbajnë bizhuteri me të tillë gurë të çmuar, sidomos gjatë sezonit të verës, që të ofrohet i njëjti standard si në vendet jashtë.
Të dhënat e INSTAT tregojnë edhe se, sipas vlerës, në vitin 2015 importet e gurëve të çmuar kanë qenë më të ulëta, krahasuar me një vit më parë.
Drejtuesit tregojnë se edhe tregu informal i krijon probleme në këtë treg, duke qenë se blihen me një çmim të ulët bizhuteri që reklamohen me gurë “të çmuar”, origjina dhe cilësia e të cilëve nuk verifikohet.
Gurët e çmuar që tregtohen edhe në Shqipëri:
Sipas vendeve të origjinës
Smeraldet: Egjipt, Austri, Afganistan, Brazil etj.
Safirët: Sri Lanka, Tajland, Australi dhe Kamboxhia
Akuamarinë: Brazil, Zambia, Mozambik, Angola, Nigeri, Afganistan
Rubinë: Mianmar
Diamante: Kanada, Amerika Jugore, Afrikën Jugore dhe Lindore, Indi, Rusi, Australi, Azia Lindore etj.