Kuvendi nuk do mblidhet të enjten në seancë plenare

Seanca e përjavshme e Kuvendit nuk do të zhvillohet këtë të enjte për t’i lënë më shumë kohë komisioneve parlamentare të vijojnë punën me shqyrtimin e projektligjeve të parashikuara në kalendarin trejavor të punimeve.

Burime zyrtare nga Kuvendi thanë për ATSH-në se axhenda trejavore e parlamentit për periudhën 13 qershor -1 korrik ka të planifikuar vetëm dy seanca plenare, më 23 dhe 30 qershor, ndërsa data 16 qershor nuk parashikon mbledhje në seancë.
Aktualisht, në komisionet e përhershme janë për diskutim disa pr/ligje, si ai “Për zejtarinë në Republikën e Shqipërisë”; disa ndryshime në ligjin “Për koncesionet dhe partneritetin publik privat”; dekreti Presidentit “Për kthimin për rishqyrtim në Kuvend ligjin “Për masat shtesë të sigurisë publike”; ratifikimin e protokollit të Traktatit të Atlantikut Verior për aderimin e Malit të Zi, etj.