‘Ligjet’, shumica voton e vetme kandidaturat e saj për KQZ, replika

Komisioni i Ligjeve ka zhvilluar sot një seancë dëgjimore me kandidatët e përzgjedhur nga shumica, PS dhe LSI si anëtarë të KQZ-së, të cilat i ka votuar më pas. Tre kandidaturat morën vetëm votat e shumicës, pasi përfaqësuesit e PD-së Halimi, Ristani dhe Ndoka u larguan nga mbledhja, duke mos marrë pjesë në votim.

Gjatë fjalës së tij, Denar Biba, i cili edhe më herët ka qenë anëtar i KQZ-së deklaroi se atëherë e dha dorëheqjen në një situatë ku kishte trysni politike.

I pyetur nga Arben Ristani nëse do rrinte në këtë detyrë, Biba u shpreh: “Ju jap garancinë që do respektoj ligjin dhe Kushtetutën”.

Relatori Blendi Klosi ka deklaruar se të 3 kandidatët plotësojnë kushtet dhe kriteret e ligjit.

Ndërsa deputeti i LSI-së, Spartak Braho u shpreh kundër përbërjes së KQZ-së.

“Përbërja 4 me 3 për opozitën është e gabuar”.

Arben Ristani i PD-së doli kundër kandidatëve duke thënë se Biba dhe Jorgaqi nuk plotësojnë kriteret.

“Biba ka braktisur detyrën duke shkelur ligjin, ndërsa Jorgaqi solli CV të rreme për anëtar të Gjykatës Kushtetuese. Jorgaqi ka gënjyer para Parlamentit”.

Në replikë deputeti i PS-së Armando Subashi e quajti të pamoralshëm qendrimin e PD. Sipas tij, “PD me anëtarët e saj e Ristanin vodhën zgjedhjet”.