Linda Rama: 60% e grave, të paktën një herë të dhunuara

“Gratë dhe vajzat janë më sensitive ndaj çështjes së dhunës gjinore, por burrat dhe djemtë janë indiferentë dhe të pandjeshëm”. Kështu është shprehur Linda Rama, bashkëshortja e kryeministrit Edi Rama, në aktivitetin e organizuar ditën e sotme në hotel Tirana,  në kuadër të fillimit të fushatës 16 ditore kundër dhunës me bazë gjinore.
Gjatë fjalës së saj, Linda Rama nënvizoi faktin se dhuna është një fenomen që  prek më shumë gratë sesa burrat, më shumë familjen sesa shoqërinë duke shtuar dëmin psikologjik të familjes, ndërsa pohoi se rreth 60% e grave të paktën një herë kanë qenë të dhunuara në jetën e tyre.

Ndërkaq, ajo theksoi se vitin e fundit janë shtuar rastet e denoncimit, dhe shoqëria jonë sipas saj, është e pajisur me informacion por ka nevojë për sensiblizim. Duke argumentuar dhunën, Rama tha se dhuna është e pranishme jo vetëm në zonat rurale por edhe ato urbane.

Gjithashtu, ajo sugjeroi që pika e parë e kontaktit për të denoncuar dhunën duhet të jetë policia në vend të pushtetit lokal.
Sipas Ramës, të gjitha rastet e dhunës duhet t’i përgjigjen detyrimeve ligjore, jo të mbeten të pandëshkuara.

“Kapacitetet e institucioneve lokale dhe qendrore kërkojnë staf të trajnuar për çështjet e dhunës me bazë gjinore. Programet e shoqërisë civile janë më të përgatitura për çështjet e dhunës, por ka mungesë fondesh për realizimin e tyre”, tha ajo.

Rama nënvizoi se problemi i dhunës është një problem që kërkon sensiblizim dhe zgjidhje, për të denoncuar çdo rast dhune dhe padrejtësie