LSI mbledh sot Konventën Kombëtare, zgjidhet kryetari i ri i partisë
Pas dorëheqjes së Petrit Vasilit nga posti i kryetarit, Lëvizja Socialiste për Integrim do të mbledhë sot Konventën Kombëtare Zgjedhore.
Konventa do të nis në orën 18:00 për të zgjedhur kryetarin dhe zv.kryetarin e LSI-së.
“Lëvizja Socialiste për Integrim zhvillon ditën e mërkurë, më datë 5 korrik Konventën Kombëtare Zgjedhore. Konventa starton në orën 18:00 e do të mirëpresë delegatët e LSI nga e gjithë Shqipëria për të zgjedhur Kryetarin dhe Zv.Kryetarin e ri të partisë”, thuhej në njoftimin e LSI-së pak ditë më parë.
Sakaq, në vend të Vasilit është propozuar Monika Kryemadhi, e cila aktualisht mban postin e nënkryetares.
Ilir Meta dha dorëheqjen nga posti i kryetarit të LSI-së pas zgjedhjes President i Republikës, ndërsa pas tij u zgjodh Petrit Vasili kryetar dhe e drejtoi LSI-në për dy muaj.
