Malisheva është rikthyer te fitorja në Superligën e Kosovës në futboll, duke regjistruar suksesin e dytë në këtë edicion.

Skuadra malishevas të shtunën pasdite, në kuadër të xhiros së tretë, triumfoi 3:0 në udhëtim ndaj Feronikelit ’74.

Protagonisti kryesor i kësaj fitoreje ishte Kreshnik Uka, i cili realizoi dy nga tre golat e Malishevës.

Uka e zhbllokoi rezultatin që në minutën e 10-të, duke i dhënë epërsinë skuadrës mysafire.

Malisheva e dyfishoi avantazhin në minutën e 24-t, kur Laurent Xhylani ishte i saktë nga pika e bardhë.

Në pjesën e dytë, Uka vulosi fitoren e Malishevës me golin e tij të dytë personal në minutën e 56-të, për rezultatin përfundimtar 0:3.

Me këtë fitore, Malisheva shkon në kuotën e 7 pikëve pas tri xhirove, ndërsa Feronikeli ’74 mbetet pa pikë.

Për skuadrën nga Drenasi kjo ishte disfata e tretë radhazi në kampionat.