Mbijetesa e Universitetit të Tetovës: Sakrifica që nuk duhet të harrohet (Video)

Më 4 qershor 1994, në Tetovë themelohet universiteti i parë shqiptar në Maqedoni. Themelimi i këtij universiteti dhe sakrifica e shqiptarëve të kësaj nuk duhet të harrohet kurrë.

Viti 1994 nuk ishte vit i mirë për shqiptarët, kudo që ata jetonin në Ballkan. Shqipëria mezi merrte veten pas rënies së komunizmit, Kosova ishte nën pushtimin klasik serb, ndërsa në situatë hiq më të mirë nuk gjendeshin as shqiptarët e Maqedonisë.

Dokumentarin që do ta shihni më poshtë, e ka realizuar TV ART nga Tetova. Aty flasin themeluesit e këtij institucioni arsimor, ata që i lëshuan shtëpitë e tyre pa asnjë kompensim, si dhe studentët e asaj kohe.

Shqiptarët në kohë të vështira, gjithmonë e kanë treguar solidaritetin e tyre. Por, sot kjo nuk po ndodh. Vlerat e mirëfillta po harrohen, ndaj po humbet edhe njerëzorja ndër ne.

Këtë më së miri e ilustron deklarata e Aqif Ibrahimit, i cili kishte lëshuar shtëpinë e tij për Fakultetin e Historisë.

“Ishte kohë kur fjala ishte fjalë e burri ishte burrë. Sot për fat të keq, nuk e kemi këtë. Ishte kohë kur i besonim njëri-tjetrit, nuk kishte tradhti si sot, nuk kishte interesa personale në nivelin si sot”, thotë ai.

Sakrifica e shqiptarëve të Maqedonisë, sidomos e tetovarëve, ishte e pashoqe për mbajtjen gjallë të këtij universiteti. Këtë sakrificë shqiptarët, kudo që jetojnë, nuk duhet ta harrojnë.

Shikojeni dokumentarin nga i cili duhet të nxirren shumë mësime për të sotmen.