“Meeting of Styles” – Festivali i grafiteve në Prishtinë

Chus është një artist italian që viziton Kosovën për herë të parë. Në një bisedë me Zërin e Amerikës ai tha se është i befasuar për të mirë meqë para se të vinte kishte një lloj paragjykimi për Kosovën dhe vendet e Ballkanit në përgjithësi.

“Është hera e parë që vizitoj një vend të Ballkanit, do të gënjeja nëse them se nuk kam pasur paragjykime për shkak se nuk e kam njohur këtë rajon dhe mbaja mend vetëm nga fëmijëria që kishte një luftë këtu, por kurrë nuk kam qenë për vizitë dhe nuk dija cfarë të prisja. Jam i befasuar shumë për të mirë”, tha ai.

Anea Kuqi, bashkërenduese për mediat e këtij festivali, thotë se ai po rritet nga viti në vit duke përmbushur synimin për promovimin e Kosovës në rrafshin ndërkombëtar.

“Po rritet edhe puna edhe veprimtaritë që zhvillohen, këtë vit është edhe punëtoria ku mund të shihet puna e artistëve se si zhvillohet hap pas hapi dhe janë të ftuar njerëzit nga të gjitha moshat, gjithashtu ka edhe ngjyrosje të fytyrës, muzikë, është edhe urban bazari ku artistët e rinj mund t’i shesin krijimet e tyre këtu në festival”, tha ajo.

Artistja Line, vjen nga Zvicra për të tretën herë në Kosovë për t’u bërë pjesë e këtij festivali.

“Kam ardhur me bashkëshortin tim i cili gjithashtu është artist dhe vajzën tonë dy vjeçe. Kosova është një vend shumë i përshtatshëm për familje, ka energji të mirë, na pëlqen shumë ky vend. Festivali është një mundësi e mirë për neve të takohemi me artistë të tjerë”, thotë ajo.

“Meeting of Styles” filloi për herë të parë në Gjermani në vitin 2002, si një nismë e admiruesve të grafitit, me synim të mbështetjes së shkëmbimit ndërkulturor mes vendeve të ndryshme. Në Kosovë këtë vit mbahet edicioni i shtatë i këtij festivali, që zgjatë tre ditë dhe zhvillohet në rrugën B në Prishtinë.