Meta dhe Berisha: Më 14 maj, votojmë kundër shpopullimit

Kryetari i Partisë së Lirisë, Ilir Meta deklaron se “më 14 maj nuk votojmë vetëm për Bashkitë. Votojmë kundër shpopullimit!”.

Në një postim në facebook, Meta i është bashkuar mesazhit të kryetarit të Komisionit të Rithemelimit të PD-së, Sali Berisha drejtuar qytetarëve për zgjedhjet vendore.

Meta shprehet se “e vërteta është se sa më shumë pushtet mbledh Edi Rama, aq më shumë ikin shqiptarët. Sepse me këtë pushtet, ai krijon kushte për dëbimin tuaj. Letra e Dr. Sali Berishës është një letër që duhet lexuar me vëmendje nga të gjithë”.

Berisha në letrën drejtuar qytetarëve thekson se “kam kaluar shumë fushata elektorale ndër vite. Por kurrë, në asnjë fushatë, kurrë nuk është diskutuar ekzistenca e Shqipërisë, siç po ndodh në këto zgjedhje”.

“Ne kemi humbur 33% të popullsisë në 10 vite. 83% të atyre që kanë mbetur, kërkojnë të largohen. Qytetet tona po shuhen. Rinia po zhduket. Kurrë nuk ka qenë Shqipëria në rrezik si ky. E vërteta është se sa më shume pushtet mbledh Edi Rama, aq më shumë ikin shqiptarët sepse me këtë pushtet, ai krijon kushtet për dëbimin tuaj”, deklaroi ai në letrën e publikuar një ditë më parë.

Sipas tij, sot, shqiptarët janë ende shumicë, por jo për shumë gjatë. 83% e tyre kërkojnë të ikin.

“Vota për Edi Ramën nxit shpopullimin. Kur të mbeten shqiptarët e fundit, do të jetë shumë vonë për të shpëtuar Shqipërinë. Prandaj në këto zgjedhje, bashkimi i çdo shqiptari është jetik. Shqipëria e të gjithëve është në rrezik. Le ta shpëtojmë atë”, është shprehur Berisha.