Mick Jagger po festonte në ishullin italian, policia ndërhyn dhe ndërpret muzikën

Një festë e organizuar në ishullin Stromboli, ku mori pjesë edhe Mick Jagger, u ndërpre nga policia italiane për shkak të rregullave lokale që ndalojnë muzikën të mërkurave.

Sipas mediave italiane, këngëtari i grupit The Rolling Stones po festonte me kastin e filmit të ardhshëm Three Incestuous Sisters, ku luajnë Dakota Johnson, Jessie Buckley, Saoirse Ronan dhe Josh O’Connor.

Aktorët dhe stafi i filmit kishin organizuar festën për të shënuar përfundimin e xhirimeve në ishullin pranë brigjeve të Siçilisë, përpara se karabinierët të ndërhynin për ta ndalur muzikën.

Drejtoresha e zyrës së turizmit në Stromboli, Rosa Oliva, konfirmoi incidentin dhe e cilësoi ndërhyrjen e policisë si “ndëshkuese”.

Sipas raportimeve lokale, muzika po luhej me volum të moderuar përmes një altoparlanti të vogël kur policia ndërhyri. Agjencia italiane e lajmeve Ansa raportoi se ndërhyrja u prit me habi dhe të qeshura nga të pranishmit, të cilët më pas pranuan kërkesën e oficerëve për të ndërprerë festën.

Oliva kritikoi gjithashtu autoritetet lokale, duke deklaruar se ishulli po penalizohet edhe në momentet që sjellin promovim dhe përfitime ekonomike për komunitetin. Ajo shtoi se pritej një mirëseardhje më e ngrohtë për mysafirët dhe kontributin e tyre në ekonominë lokale.