FOKUS – SHBA konsultohet me aleatët e NATO-s ndërsa shqyrtojnë praninë e trupave në Evropë

BRUKSEL, 28 gusht /ATSH-DPA/ – Nënsekretari i Mbrojtjes i SHBA-së, Elbridge Colby, u takua me sekretarin e përgjithshëm të NATO-s, Mark Rutte, dhe ambasadorët e aleancës në Bruksel, ndërsa Uashingtoni shqyrton praninë e trupave amerikane në Evropë.

Uashingtoni dëshiron kontributin e aleatëve “drejtpërdrejt me shkrim”, tha Colby, duke iu referuar një pyetësori që SHBA-të i dërguan së fundmi anëtarëve të tjerë të NATO-s.

Shqyrtimi, i njoftuar në qershor nga Sekretari i Mbrojtjes i SHBA-së, Pete Hegseth, ka ngritur shqetësime në lidhje me tërheqjet e mundshme të trupave amerikane nga Evropa.

Colby nuk tha se ”sa vende amerikane në Evropë mund të reduktohen ose mbyllen si pjesë e shqyrtimit të vazhdueshëm të pranisë ushtarake amerikane”.

Ai tha se ”përgjigjet dhe ofertat e aleatëve do të vlerësoheshin së pari”.

Ky veprim është pjesë e shtytjes së Uashingtonit për një të ashtuquajtur “NATO 3.0”, sipas të cilit aleatët evropianë marrin përgjegjësinë kryesore për mbrojtjen konvencionale të Evropës dhe sigurojnë pjesën më të madhe të forcave të nevojshme.

Sipas këtij modeli, SHBA-të duhet të vazhdojnë t’i ofrojnë aleancës mbrojtjen bërthamore, ndërkohë që do ta përqendrojnë kontributin e tyre ushtarak konvencional në aftësi më të kufizuara dhe të synuara./ /os/ a.jor.