Mirë për turistët, po për autoktonët zoti kryeministër!?

[author ][/author]

Populli i mbështet idetë tuaja për zhvillimin e turizmit elitar si dhe atij familjar.Tërë Jugu ju mban në gojë për hapjen e tunelit të Llogarasë. Do t’i japë një impuls si turizmit dhe lëvizjes së popullsisë së atyre anëve. Punimet për aeroportin e Vlorës janë gjithashtu një vlerë e shtuar për qeverinë që kryesoni. Pa renditur edhe të tjera objekte me rëndësi që jeni duke bërë,këto i keni realizuar edhe pse opozita thellësisht negative është përpjekur t’ju vërë gurë nën rrota. Me vendosmëri dhe guxim ia keni dalë. Megjithatë në këtë rrugë të suksesëshme zhvillimi të pandërprerë, edhe gabimet nuk i keni të pakta. Ato sikur ia zbehin shkëlqimin edhe veprave madhore.Një nga këto gabime të pafalshme dua të shtjelloj në këtë shkrim. E kam fjalën për bllokimin që i bëtë ju buzëdetit të Jonit. Dakord që janë ngritur dhe do të ngrihen hotele. Turizmi masiv qoftë ai elitar është një burim të ardhurash për popullsinë e këtyre anëve si edhe për shtetin. Ama rendja pas fitimit nuk duhet kurrsesi të privonte autoktonët nga shfrytëzimi i plazheve të tyre. Pushtimi Osman nuk u vuri gardhe në ato plazhe. Edhe PPSH-ja, kur ndërtoi Shtëpinë e Pushimit në Dhërmi nuk e bllokoi atë zonë vetëm për pushuesit. Nuk vuri as edhe një kufizim. Banorët e Dhërmiut dhe të zonës për rreth mund të vinin çadrat lirisht pranë pushuesve. Ndërsa ju sikur të ishit Zeusi i plotpushtetshëm i këtyre anëve, e keni pushtuar me urdhër tërë atë hapësirë. Shumica e pronarëve të hoteleve to vogla dhe të mëdha nuk janë nga këto vise. Janë miqtë që kanë bubrruar pranë qeverive për të patur përfitime. Jo vetëm ngritën objektet e tyre, po sa gjërësia e hoteleve kanë pushtuar edhe plazhet para tyre. Kanë vënë shezlonge, kanë ndërtuar kafe-restorante, disa mjaft të bukura. Janë kaq shumë zona të bllokuara nga këta pronarë, miq të qeverisë. Për autoktonët e Drimadhës, vetëm para Palasës, është lënë një zonë e lirë. Quhet Plazh Publik. D.m.th. plazh për ata që nuk janë turistë të hoteleve. Janë për vendasit, për autoktonët e Drimadhës. Sipërfaqja e Plazhit Publik (emër i bukur) nuk i kalon 300-500 metrat. Afërsisht e njëjta sipërfaqe edhe në Dhërmi është rezervuar si për ”mik” për banorët vendas. E tërë sipërfaqia e plazhit  që është 5-6 kilometra, e tëra e bllokuar për turistët e hoteleve? Shezlonge po, gazibo gjithashtu, rrugica po. Dushe dhe tualete funksionale. Të mos harroj edhe çadrat. Të gjitha këto për t’u krijuar pushuesve kushte sa më të mira. Po në ato pak metra me emrin e bukur Plazh Publik, çfarë u ofrohet banorëve vendas si edhe klientëve të turizmit familiar që ju propagandoni aq shumë? Më vjen keq kur them se ASGJË. Ato parcela të vogla janë lënë gadi si në Mesjetë, madje edhe më keq. Po, po, më keq fare.

           Në Drimadhë më rastisi që qendroja 15 ditë dhe të thekesha në diell në Plazhin Publik. Vendasit dhe miqtë e tyre spanjollë, hollandezë, italianë, grekë, që pata rastin t’i shikoj dhe takoj disa nga ata,e pëlqenin jashtë mase ujin si kristal të detit, diellin, guriçkat. Jepeshin me qira edhe varka e motorra uji për shetitje. Bukur.Por pas kësaj bukurije mahnitëse të natyrës, u dilte një AH! i fuqishëm që kishte lidhje me faktorin NJERI-QEVERI. Nuk kishte WC publike. As edhe një dush të vetëm. Ku të shkonin të shkretët njerëz?! Në det? Jo, ndërgjegja e tyre nuk ua lejon që të fyejnë natyrën. Detyroheshin të shkonin në restorantet pas rrugës, të merrnin diçka për të pirë që të lehtësoheshin në tualetin e lokalit.

           Kishte dhe më keq. Sa fillonte parcela e  plazhit dy-tre treillera me targa çeke dhe gjermane. Ato bukuri. Nuk ndosnin mjedisin, se i kanë të gjitha kushtet brënda treillerit.E keqja ishte se për nja 7-8 ditë aty u ngritën edhe disa çadra me pushues nga Tirana dhe Kosova. Ata njerëz nuk kishin as kushtet më minimale. Plazhi, gjatë natës për ta qe kthyer  në një WC nën ”rrezet” e hënës. Doemos ”produktin” e nxjerrë nga organizmi e mbulonin me guriçkat e vocklëla. Prandaj shpesh na vinte edhe një erë jo e këndshme, ndonëse ishim në atë bregdet përrallor…Kjo është fyerje që i bëjmë ne dhe ju natyrës sonë të mrekullueshme, zoti Kryeministër.

            Turistët e treillerave nuk paguanin gjë. Edhe ata të çadrave e kishin plazhin gratis?! Helbete malli i shtetit, si mall belik, na e kanë lënë këtë shprehje turqit osmanë.

            Pyesja veten pse i ka mbyllur sytë Bashkia e Himarës? Ku është kontrolli i saj? Taksapaguesit e Dhërmiut dhe të Drimadhës si lagje e saj, nuk paguanin aq taksa, sa në dy parcelëzat me mbishkrimin ”Plazh Publik” të mos kishte WC dhe dushe?!

             Po Bashkia e Vlorës? Si seksioni komunal dhe ai i shëndetësisë pse ia këpusin gjumit letargjik dhe nuk kryejnë detyrën për të cilën paguhen?! Besoj se ata e dinë që në botën normale nuk ka Plazh Publik pa WC dhe dushe. Pse Shqipëria të bëjë përjashtim?!

             Shkalla e përgjegjësisë vjen duke u ngritur. Kemi edhe një Ministri për Turizmin. Kaq larg qenkan për ta dy Plazhet Publike të Dhërmi-Drimadhës sa nuk do të kenë  marrë mundimin të shkojnë deri atje? Sikur edhe pak orë të qendronin , kishin për të rendur për të gjetur një të shkretë WC. Le pastaj, po të ishin me ndonjë shrregullim stomaku?!

              Lashë për në fund zotin Kryeministër. Do të thoni se ajo nuk është detyra e tij. Dakord. Ama di edhe tjetrën: së bashku me Berishën më 2008, të dy ia hoqën edhe ato pak kompetenca që kishte Presidenti.  Tërë frenat e shtetit ia dhanë postit kryeministror.  Me të drejtë kushtetuese zoti Rama është absolut.Si i tillë, me që verës pushon në rezidencën qeveritare të Dhërmiut, nuk i kushton gjë të vizitojë qoftë për disa minuta këto dy Plazhe Publike mjerane të autoktonëve të kësaj zone dhe turistëve që strehojnë ata.Turizmi, zoti Kryeministër, ju e dini më mirë se unë, higjienën e ka më se parësore.

             Kjo neglizhencë e patolerueshme e qeverisë, që nuk kërkon fonde të mëdha, por vetëm mendje të kthjellët dhe dashamirësi, ka kohë të rregullohet për stinën që po na troket në derë.

              Po zezania opozitë pse nuk hidhet në mbrojtje të dinjitetit të banorëve autoktonë të zonës së Bregut, po grinden midis vetes?! Në vend që ta kryqëzojnë Ramën për gjëra konkrete që ia vlen, gënjejnë e shpifin për një proces gjyqësor të MacGonigallit që zhvillohet në Washington ku ai nuk është i akuzuar, as dëshmitar, po vetëm përmendet se paska takuar 4 herë ish shefin e agjenturës së NewYorkut. Ku qendroka krimi që na paska bërë ai?!… Atë që Rama u ka bërë bregasve nuk ua bënë as pushtimet e huaja dhe as diktatura e egër komuniste! Siç duket, edhe opozitarët, zaptimin e plazheve të Bregut, mbase e quajnë krejt pas rëndësi. Nuk thonë kot se i njëjti stan atë bulmet ka.

                 Po e mbyll shkrimin me Kanën e Francës. Plazhi ishte kilometrik. As edhe një kufizim. Turistët vinin çadrat dhe i merrnin në hotelet ku banonin, kur largoheshin nga plazhi. Kana është një nga plazhet më të njohura dhe të mëdha të Europës. Si në Francë dhe vende të tjera, edhe pse ka plazhe private, ama Plazhet Publike i kanë të gjitha kushtet higjienike.