Mustafa: Opozita po ia adreson Qeverisë keqpërdorimet që nuk i ka bërë

Kryeministri i Kosovës, Isa Mustafa, përmes një postimi në Facebook ka reaguar ndaj mocionit të mosbesimit nga opozita, i cili të mërkurën do të diskutohet në Kuvendin e Kosovës.

Mustafa ka thënë se nuk ka pritur se Qeverisë së tij do të tentohet t’i adresohen keqpërdorimet, vjedhjet, abuzimet e aferat me të cilat asnjë vendim dhe anëtar i kësaj Qeverie s’ka të bëjë.

Postimi i plotë i Mustafës:

“Të nderuar qytetarë,

Kam pritur se Mocioni i opozitës do të përmbajë diçka që kemi punuar keq apo s’kemi punuar atë që kemi premtuar. Por, se kësaj Qeverie do të tentohet t’i adresohen keqpërdorimet, vjedhjet, abuzimet e aferat me të cilat asnjë vendim dhe anëtar i kësaj Qeverie s’ka të bëjë, nuk kam pritur! Asnjë mocion kundër Qeverisë nuk i shpëton ata që mendojnë të plaçkisin 30 milion euro nga Telekomi i Kosovës, ata që ia bënë shtetit faturën e pasaportave mbi 5 milion euro apo ata që shpresojnë se do ta plaçkisin shtetin edhe përmes Axosit, nëse kjo Qeveri bie” (sic.), ka shkruar Mustafa.